Пасяджэнне па выніках праекта “Умацаванне актыўнага грамадзянства ў Браславе і Шаркаўшчыне” прайшло ў нашым гарадскім пасёлку Шаркаўшчына 30 лістапада.
Пачаткам праекта стала сумесная сустрэча браслаўчан і шаркаўчан з прадстаўнікамі мясцовых улад, педагогаў, музейных работнікаў, бібліятэкараў у нашым гарадскім пасёлку ў чэрвені бягучага года. Мэтай, якую ставілі перад сабой яе ўдзельнікі, стаў пошук ідэй на карысць свайго роднага горада, вёскі ў справе добраўпарадкавання, турызму, адукацыі і іншага. З усіх прапанаваных ідэй на конкурсе мясцовых ініцыятыў, які праходзіў у жніўні, былі выбраны тры. Іх аўтары атрымалі для ўвасаблення ў жыццё сваіх задумак па 310 долараў ЗША пры фінансаванні Фонду мясцовых ініцыятыў.
Кіраўнік праекта, дырэктар сацыяльна-інфармацыйнай установы “Традыцыі і інавацыі Паазер’я” Надзея Дударонак уручыла сертыфікаты фіналістам конкурсу мясцовых ініцыятыў. Імі сталі старшыня Лужкаўскага сельскага Савета Таццяна Краснадубская, настаўніца Шаркаўшчынскай СШ № 2 Аксана Пачэпка і настаўніца Браслаўскай СШ № 1 Тэрэза Станіслаўчык.
У другой частцы мерапрыемства яго ўдзельнікі накіраваліся ў аграгарадок Лужкі, дзе для іх была праведзена змястоўная экскурсія па аб’ектах міні-праекта “Турыстычны маршрут “Лужкаўскія вандроўкі”.
Сяргей РАЙЧОНАК