26 красавіка ў фае райвыканкама прайшло ўрачыстае адкрыццё раённай Дошкі гонару. На цырымонію былі запрошаны члены выканкама, кіраўнікі прадпрыемстваў, арганізацый і ўстаноў, а таксама людзі, чые партрэты і прозвішчы змешчаны на Дошцы гонару — лепшыя працаўнікі Шаркаўшчынскага раёна.
Са словамі віншавання з гэтай прыемнай нагоды да прысутных звярнуўся старшыня райвыканкама Д. М. Ламака. Дзмітрый Міхайлавіч пажадаў людзям, якія сваёй сумленнай і стараннай працай услаўляюць Шаркаўшчынскі край, і надалей прыносіць карысць роднаму раёну, сваёй малой радзіме, сваёй краіне, памнажаючы лепшыя здабыткі шаркаўчан. Кіраўнік раёна ўручыў кожнаму лепшаму працаўніку адпаведнае пасведчанне аб занясенні на раённую Дошку гонару і кветкі.
Ад імя ўзнагароджаных выступіла загадчыца ясляў-сада №1 гарадскога пасёлка Таццяна Антонаўна Собаль, якая падзякавала кіраўніцтву раёна за высокую адзнаку іх працы.
Сяргей РАЙЧОНАК