У Шаркаўшчыне адзначылі 1030-годдзе ўтварэння Полацкай епархіі
Сёлета
хрысціяне Беларусі праваслаўнага веравызнання адзначаюць вельмі знакавую дату —
1030-годдзе ўтварэння Полацкай епархіі — першай на тэрыторыі нашай краіны, якая
паклала пачатак праваслаўю на беларускіх землях.
Такая маштабная падзея не засталася незаўважанай
у нашым раёне. У школах, установах культуры праходзяць мерапрыемствы духоўнага
накірунку, дзе расказваецца пра ўзнікненне хрысціянства, распаўсюджванне
праваслаўя на землях усходніх славян і на тэрыторыі Беларусі. Людзі, асабліва
дзеці і моладзь, даведваюцца пра першых асветнікаў, якія неслі слова Божае ў
народ, хто далучаны да ліку святых праваслаўнай царквой.
24 верасня ў царкве іконы “Усіх смуткуючых
Радасць” прайшло святочнае богаслужэнне з удзелам епіскапа Полацкага і
Глыбоцкага Ігнація. Уладыка ў чарговы раз завітаў у наш гарадскі пасёлак, каб
разам з шаркаўчанамі памаліцца ў храме, благаславіць мясцовых вернікаў,
надзяліць іх сэрцы і душы святлом веры, любові і спагады.
Епіскап таксама прыняў запрашэнне наведаць
выставу на тэму духоўнасці, якую падрыхтавілі ўстановы адукацыі і работнікі
раённай бібліятэкі. Уладыка быў прыемна ўражаны тым, як у нашым раёне працуюць
з падрастаючым пакаленнем на ніве духоўнасці, прывіваюць дзецям любоў да
рэлігіі.
Супрацоўнікі раённага Цэнтра культуры, дзіцячай
школы мастацтваў падрыхтавалі тэматычны канцэрт “Слова святога ісціна і
сутнасць”, дзе гучалі вершы, духоўныя песні. А дзеці, якія наведваюць
нядзельную школу пры царкве іконы “Усіх смуткуючых Радасць”, ажыццявілі
пастаноўку спектакля на рэлігійную тэму.
Уладыка Ігнацій быў вельмі задаволены ўбачаным,
той цёплай атмасферай, якая панавала ў зале падчас мерапрыемства. Намеснік
старшыні райвыканкама Юрый Васілеўскі ў знак вялікай удзячнасці ўручыў епіскапу
памятны падарунак — карціну з выявай царквы іконы “Усіх смуткуючых Радасць”,
напісаную шаркаўшчынскім мастаком, выкладчыкам дзіцячай школы мастацтваў
Віктарам Круком. Уладыка павіншаваў шаркаўчан з 1030-годдзем станаўлення
праваслаўя ў Беларусі, пажадаў кожнаму божай міласці, здароўя і зямнога шчасця.
Сяргей РАЙЧОНАК.