Сёлета споўнілася дваццаць пяць год з моманту заснавання падатковай службы Беларусі. У нашай краіне дзяржаўная падатковая служба была створана пастановай Савета Міністраў БССР ад 2 красавіка 1990 года, а прафесійнае свята адзначаецца з 1998 года ў другую нядзелю ліпеня.

Свята — гэта не толькі нагода падвесці вынікі зробленага і вызначыць задачы на будучае. Гэта яшчэ і магчымасць выказаць словы падзякі кожнаму работніку, паколькі менавіта іх прафесійная дзейнасць служыць умацаванню дабрабыту, гарантуе сацыяльную абароненасць насельніцтва.

Асноўнымі задачамі інспекцыі па падатках і зборах па Шаркаўшчынскім раёне, якую ўзначальвае Ірына Аляксандраўна Бурчык, з’яўляюцца кантроль за выплатай юрыдычнымі і фізічнымі асобамі падаткаў у дзяржаўны бюджэт, выяўленне парушэнняў заканадаўства і правядзенне тлумачальнай работы сярод насельніцтва па пытаннях падаткаабкладання.

— Як вядома, падаткі — гэта фундамент фінансавай і сацыяльнай стабільнасці грамадства, — кажа Ірына Аляксандраўна. — Іх рэгулярнае паступленне дае дадатковыя магчымасці для павелічэння раённага бюджэту. У нашай інспекцыі працуюць дванаццаць чалавек. Кожны з вялікай адказнасцю і сумленнем выконвае свае службовыя абавязкі. Прыемна, што наша праца не застаецца па-за ўвагай з боку вышэйстаячых арганізацый. Сёлета перад прафесійным святам намесніку начальніка інспекцыі Дзмітрыю Буйчонку міністр па падатках і зборах Сяргей Налівайка ўручыў Падзяку за добрасумленную працу і высокі прафесіяналізм.

У такі святочны дзень хочацца ўспомніць людзей, якія шмат год свайго жыцця прысвяцілі працы ў інспекцыі па падатках і зборах, а цяпер знаходзяцца на заслужаным адпачынку. Гэта ветэраны працы Фёдар Мікалаевіч Русецкі, Ганна Антонаўна Макаранка, Палікарп Іосіфавіч Сцяпанаў, Эдуард Уладзіміравіч Юдыцкі, Рыта Пятроўна Піланц, Мікалай Анатольевіч Падагель, Віктар Макаравіч Марозаў, Вольга Аркадзьеўна Гімбар. Ад сябе асабіста ўсім былым работнікам я выказваю словы шчырай падзякі за адказныя адносіны да справы, жадаю кожнаму моцнага здароўя, сямейнага дабрабыту. А сённяшнім калегам па працы хочацца пажадаць толькі паспяховай прафесійнай дзейнасці і стабільных падатковых збораў на карысць Шаркаўшчынскага раёна!

Сяргей РАЙЧОНАК.