Да іх рыхтуюцца ўсе раёны вобласці. У свяце працаўнікоў сяла будзе прымаць удзел і дэлегацыя ад Шаркаўшчынскага раёна. Усе службы дасканала рыхтуюцца да таго, каб годна паказаць свой раён на абласным свяце.


Пройдзе ва ўрачыстым шэсце калона нашй дэлегацыі, па-мастацку аформленая з маляўнічай эмблемай і сцягам раёна. Следам будзе ісці ансамбль барабаншчыц з васьмі дзяўчынак, апранутых у прыгожую форму. За імі маладыя людзі на спецыяльным стэндзе панясуць стылізаванае сонца з саломкі, у руках іншых будуць снапы з ураджаю, вырашчанага на палях раёна, дэкаратыўныя граблі і косы на плячах маладых хлопцаў і дзяўчат, гліняныя жбанкі ў руках — усё гэта будзе нагадваць ранейшыя часы ўборкі збажыны.

Узначаліць калону кіраўніцтва раёна і асноўныя ўдзельнікі свята — перадавікі ўборачнай кампаніі. Гонарам калоны стануць камбайнеры і шафёры-тысячнікі. Калону будзе суправаджаць песнямі народны харавы калектыў “Спадчына” раённага цэнтра культуры.

Можна будзе даведацца і пра работу раённай газеты “Кліч Радзімы”, супрацоўнікі якой арганізуюць экспазіцыю на адведзеным для гэтага месцы на адной з пляцовак горада. Увагу да сябе прыцягнуць запрашальныя маляўнічыя афішы. Пра тое, як журналісты праслаўлялі герояў працы, перадавікоў жніва можна будзе пачытаць на яе старонках. Прызыўныя плакаты, вершы світанкаўцаў, прысвечаныя раёнцы, а таксама хлебаробам, кніжкі, выдадзеныя творчымі людзьмі раёна — усё гэта можна будзе пабачыць на спецыяльных стэндах. Сваё захапленне вышыўкай стужкамі, зробленыя карціны і майстар-клас прадэманструе загадчык сельгасаддзела рэдакцыі, зачытае прысутным свае вершы.

На адной з пляцовак будзе адведзена месца выставе-кірмашу народных рамёстваў “Кірмаш ля Парнаса”. Вырабы наведвальнікам прапануе цэнтр рамёстваў са сваімі рэквізітамі. Увазе прысутных будуць прадстаўлены вырабы з гліны і саломкі, выцінанка, вышыўкі і амулеты. А на тэатралізаванай пляцоўцы закрасуецца брэнд раёна — яблык. Пляцоўка аформіцца ў выглядзе падворка з дэкаратыўнымі яблынямі ў выглядзе вясновага квітнеючага сада. Сваё месца зойме і абярэг раёна.

І галоўнае на фестывалі «Дажынкі-2014” — ушанаванне людзей працы на зямлі, цёплыя словы ў адрас перадавікоў вытворчасці, якія атрымаюць узнагароды.

Кацярына СОСНА.