24 ноября 2016

Адкрылася выстава работ шаркаўшчынскага мастака Віктара Крука “Пад крыламі анёла”

23 лістапада ва ўстанове культуры гарадскога пасёлка ўрачыста адкрылася выстава мастацкіх работ шаркаўчаніна Віктара Крука з назвай “Пад крыламі анёла”.

Жыццё і творчасць гэтага таленавітага чалавека, які нарадзіўся на Магілёўшчыне, цалкам прысвечана нашаму прыдзісненскаму краю, нашаму раёну, дзе адбылося яго станаўленне як асобы, як мастака, як педагога. На адкрыццё выставы прыйшлі сябры і калегі Віктара Фёдаравіча, былыя вучні і тыя, хто неабыякава ставіцца да мастацтва.

— Сабраныя і прадстаўленыя на гэтай выставе работы— плён маёй працы на мастацкіх пленэрах у розныя гады, — паведаміў прысутным аўтар. — У асноўным, як вы бачыце, тут пераважае партрэтны жанр. На палотнах адлюстраваныя людзі, з якімі мне пашчасціла быць знаёмым пры жыцці. Гэта Васіль Быкаў, Рыгор Барадулін, Міхась Райчонак. Частка прац прысвечана духоўна-рэлігійнай тэматыцы, якая праз фарбы на палатне адкрывае глыбінны сэнс сюжэта.

На адкрыцці выставы сярод іншых гасцей быў і даўні сябра Віктара Крука паэт і пісьменнік Віктар Праўдзін. Ён падкрэсліў, што талент мастака, чые работы пашчасціла ўбачыць шаркаўчанам, заслугоўвае павагі.

— Яго карцінамі трэба замілавацца, каб пазнаць глыбінны сэнс таго, што хацеў перадаць гледачу аўтар у сваёй рабоце, — сказаў Віктар Праўдзін. — Менавіта рэалістычная плынь у мастацтве, прыхільнікам якой і з’яўляецца Віктар Фёдаравіч, у поўнай меры становіцца зразумелым звычайнаму чалавеку.

Шмат жадаючых было выказаць свае думкі і пачуцці ў адрас Віктара Фёдаравіча Крука. На выставе прысутнічаў намеснік старшыні райвыканкама Юрый Анатольевіч Васілеўскі, які яшчэ раз адзначыў вартасць прадстаўленых мастацкіх работ, падзякаваў аўтару за плённую працу і пажадаў яму доўгіх год жыцця.

Нагадаем, што ў шаркаўчан і гасцей нашага гарадскога пасёлка ёсць цудоўная магчымасць наведаць выставу мастацкіх работ Віктара Крука “Пад крыламі анёла”, якая будзе працаваць у раённым Цэнтры рамёстваў да 25 снежня.

Сяргей РАЙЧОНАК.