18 декабря 2014

Адкрыты дыялог “Моладзь Беларусі: традыцыі і будучыня”

Беларускі рэспубліканскі саюз моладзі стаў ініцыятарам правядзення адкрытага дыялога “Моладзь Беларусі: традыцыі і будучыня”. Яго мерапрыемствы праходзяць паэтапна: спачатку ў раёнах і гарадах, затым у абласных цэнтрах, а рэспубліканскі этап плануецца правесці напрыканцы сёлетняга года. У сярэдзіне снежня ў СШ № 1 гарадскога пасёлка па ініцыятыве райкама БРСМ адбылася сустрэча маладзежных актывістаў раёна з работнікамі райвыканкама, спецыялістамі шматлікіх служб і праваахоўных органаў, якія выступілі ў ролі экспертаў і адказвалі на пытанні, узнятыя прадстаўнікамі маладога пакалення. На сустрэчы прысутнічалі першы сакратар райкама БРСМ Ю. Л. Протас, начальнік аддзела ідэалагічнай работы райвыканкама Л. У. Стома, намеснік начальніка гэтага аддзела І. А. Іваноў, намеснік начальніка аддзела адукацыі, спорту і турызму райвыканкама К. Р. Міхнёнак, начальнік аддзела занятасці насельніцтва і сацыяльна-працоўных адносін упраўлення па працы, занятасці і сацыяльнай абароне райвыканкама Л. М. Бука, участковы інспектар па справах непаўналетніх І. І. Пачкоўскі, урач псіхіятр-нарколаг К. В. Галай, дырэктар фізкультурна-спартыўнага клуба “Шаркаўшчына” Ю. С. Каплуноўская і інструктар-метадыст гэтага клуба В. А. Шадрына.

У ходзе мерапрыемства закраналіся пытанні спартыўна-аздараўленчага характару, працаўладкавання непаўналетніх у час канікулаў, наяўнасці льгот для маладых спецыялістаў і іншыя. На кожнае зададзенае пытанне прысутныя атрымалі змястоўны адказ. Як паведаміла ў канцы сустрэчы першы сакратар райкама БРСМ Ю. Л. Протас, узнятыя пытанні і пажаданні не застануцца па-за ўвагай з боку зацікаўленых дзяржаўных структур, а стануць фундаментам для вызначэння новага сучаснага вектара ў рабоце Беларускага рэспубліканскага саюза моладзі. У другой частцы мерапрыемства былі падведзены вынікі раённага этапа працоўнага семестра 2014 года па арганізацыі другаснай занятасці моладзі. Узнагароджаны дыпломамі і каштоўнымі падарункамі школьныя атрады, якія прымалі актыўны ўдзел на добраўпарадкаванні тэрыторый вытворчых аб’ектаў і ў час уборкі ўраджаю ў сельгаспрадпрыемствах. Па рэкамендацыі Віцебскага абласнога камітэта ГА БРСМ за актыўны ўдзел у мерапрыемствах раённага, рэгіянальнага і абласнога ўзроўняў, а таксама за ўдзел у выставе-прэзентацыі інавацыйных праектаў “100 ідэй для Беларусі” каштоўным падарункам узнагароджаны калектыў вучняў Германавіцкай сярэдняй школы.

Сяргей РАЙЧОНАК