10 июля 2017

Аграгарадок Лужкі наведала дэлегацыя з Ізраіля

6 ліпеня аграгарадок Лужкі наведала дэлегацыя з Ізраіля – прадстаўнікі арганізацыі "Другое пакаленне".

6 ліпеня аграгарадок Лужкі наведала дэлегацыя з Ізраіля – прадстаўнікі арганізацыі "Другое пакаленне". Гэта людзі, чыім бацькам давялося перажыць халакост — масавае знішчэнне нацыстамі мірнага яўрэйскага насельніцтва ў гады Другой сусветнай вайны. Замежныя госці ўжо пабывалі ў многіх населеных пунктах Беларусі, дзе захаваліся аб'екты культурнай яўрэйскай спадчыны. У ліку такіх месцаў – і аграгарадок Лужкі нашага раёна.

Мірнае жыццё яўрэйскага насельніцтва на тэрыторыі нашага раёна спыніла Вялікая Айчынная вайна. 1 чэрвеня 1942 года было ліквідавана гета ў Лужках, пры гэтым 916 яўрэяў былі знішчаны. Выратавацца ўдалося нямногім. Як даніна памяці ахвярам халакосту вязням гета ў вёсцы Лужкі на месцы пахавання растраляных яўрэяў устаноўлена магільная пліта, - пра ўсё гэта госці даведаліся падчас візіту ў наш раён.

Старшыня Лужкаўскага сельскага Савета Таццяна Мікалаеўна Краснадубская разам з работнікамі мясцовага сельскага Дома культуры і мясцовымі жыхарамі гасцінна, з хлебам-соллю сустрэла гасцей у цэнтральным скверы аграгарадка ля помніка Эліэзеру Бэн-Іегудзе. Цікавую святочную праграму для прадстаўнікоў арганізацыі "Другое пакаленне" падрыхтавалі і правялі ўдзельнікі народнага вакальнага ансамбля "Лужкаўскія песняры" (Лужкаўскі СДК), педагогі Шаркаўшчынскай дзіцячай школы мастацтваў разам з майстрамі Дома ганчара і супрацоўнікамі раённага Цэнтра рамёстваў. Потым гасцей чакала цікавая экскурсія па аграгарадку, знаёмства з унікальнай гісторыяй вёскі Лужкі, наведванне мураванага будынку былой сінагогі.

Адзін з прадстаўнікоў замежнай дэлегацыі, вядомы ізраільскі пісьменнік Хаім Беэр шчыра падзякаваў нашым землякам за тое, што ў Шаркаўшчынскім раёне захоўваецца памяць пра мірнае яўрэйскае насельніцтва, якое не пашкадавала вайна. Гэтыя людзі ўсё жыццё пражылі на нашай Шаркаўшчынскай зямлі і заслугоўваюць таго, каб пра іх помнілі. У падарунак замежныя госці прывезлі з сабою кнігі – слоўнікі іўрыта, выданнем якіх займаўся ўраджэнец вёскі Лужкі — Эліэзэр Бэн Іегуда. Яны будуць захоўвацца ў Лужкаўскім сельскім Савеце.

Вольга ЧАРНЯЎСКАЯ.