Работнікі культуры падрыхтавалі святочнае прадстаўленне “Адшукваецца мяшок Дзеда Мароза”. Казачныя героі – Снегавік і Хлапушка – з дапамогай сышчыка рабілі ўсё магчымае, каб адшукаць мяшок з падарункамі для дзяцей, якія сабраліся на ранішнік і чакалі прыемных навагодніх сюрпрызаў ад Дзеда Мароза і Снягурачкі. Урэшце рэшт падарункі былі знойдзены і свята атрымала свой вясёлы працяг. 

– Дарагія дзеці, віншую вас з надыходзячым Новым годам і жадаю, каб ён кожнаму прынёс спаўненне ўсіх вашых жаданняў, – з такімі словамі да хлопчыкаў і дзяўчынак звярнуўся старшыня раённага выканаўчага камітэта М. І. Баговіч. – Расціце здаровымі, моцнымі, разумнымі і абавязкова слухайцеся бацькоў, выхавальнікаў і настаўнікаў.

Затым Мікалай Ірынархавіч уручыў прысутным дзецям салодкія навагоднія падарункі.

Тым часам Дзед Мароз, Снягурачка і іншыя персанажы тэатралізаванай пастаноўкі запрасілі малышоў у карагод каля ёлкі. Хлопчыкі і дзяўчынкі ў прыгожых касцюмах казачных герояў, лясных звяркоў весела танчылі вакол святочна ўбранай “зялёнай прыгажуні”, чыталі вершы, спявалі і ўдзельнічалі ў гульнях, ніхто з іх не застаўся без падарункаў. Дзед Мароз шчодра раздаваў цукеркі, шакаладкі, цацкі, каб малышы змаглі адчуць узнёслую атмасферу казачных навагодніх святаў.

Сяргей РАЙЧОНАК