12 июня 2023

Корманарыхтоўка ў Шаркаўшчынскім раёне набірае абароты

Як паведаміў начальнік аддзела арганізацыі сельгасвытворчасці райсельгасхарчу Валерый Катовіч, у гаспадарках маецца 20 корманарыхтоўчых камбайнаў, 41 — касілка, 27 — грабляў, 20 — прэспадборшчыкаў і яшчэ 4 — з адначасовай абмоткай у стрэйч-плёнку.

Першымі ў раёне сярод сельгаспрадпрыемстваў да нарыхтоўкі сенажу ў траншэі прыступілі аграрыі КУВСП імя Маркава. На 35-гектарнае поле, дзе расла канюшына, вывелі сваю тэхніку мясцовыя механізатары. На трактарах «Беларус» МТЗ-1221 у счэпе з касілкамі працуюць Аляксандр Кірэй і Дзяніс Маслаў. Апошні аказвае дапамогу сельгаспрадпрыемству ад сялянска-фермерскай гаспадаркі «М.А.Атопкін». На зграбанні правяленай масы задзейнічаны механізатар Мікалай Кухто. Як і ў мінулыя гады, здрабненнем зялёнай масы займаецца Дзмітрый Качан на корманарыхтоўчым камбайне КВК-800. Адвозяць «зялёнку» ў сянажныя траншэі Вячаслаў Відун на «Кіраўцы» К-744 і Канстанцін Руткоўскі на «Беларусе» МТЗ-3022.

— Адсутнасць дожджу ў маі, сухое надвор’е адмоўна паўплывалі на травастой, — кажа дырэктар гаспадаркі Юрый Жынгель. — Стараемся ў кароткія тэрміны правесці і закончыць першы ўкос у надзеі, што другі будзе значна лепшы. Але гэта толькі пры тым, калі пойдуць дажджы. Цяпер жа маем тое, што ёсць. Запланавана скасіць травы першага ўкосу на плошчы 1040 гектараў. Усяго ж трэба нарыхтаваць 405 тон сена і 6300 тон сенажу.

Сяргей РАЙЧОНАК http://www.klich.by/?p=122319