Пытанням гістарычнага мінулага мястэчка Лужкі, яго сацыяльна-эканамічнага развіцця ў розныя гады была прысвечана краязнаўчая канферэнцыя «Лужкі: погляд праз стагоддзі», якая адбылася на базе Лужкаўскай сярэдняй школы 31 кастрычніка. Адкрыла канферэнцыю і выступіла з дакладам па асноўнаму пытанню загадчык Лужкаўскай бібліятэкі Ірына Машара. Пра развіццё асветы і адукацыі ў мястэчку прысутным паведаміла намеснік дырэктара школы па выхаваўчай рабоце Алена Арэхава. Шмат цікавых гістарычных фактаў аб дзейнасці святароў праваслаўнай царквы Раства Прасвятой Багародзіцы і касцёла Міхаіла арханёла данеслі слухачам протаіерэй Пётр Бараноўскі і член парафіяльнага касцёльнага камітэта Ганна Ластаўка. Краязнаўца Эдмунд Гірын у сваім дакладзе закрануў той час, на які прыйшоўся сацыяльна-эканамічны ўздым у гісторыі мястэчка і калі ў Лужках масава сталі сяліцца, а затым развіваць тут гандаль і рамяство прадстаўнікі яўрэйскай нацыянальнасці. Сёлетні год ва ўсёй краіне прайшоў пад знакам 70-годдзя вызвалення ад нямецка-фашысцкіх захопнікаў. Гэтай даце быў прысвечаны шэраг мерапрыемстваў, якія ладзіліся на тэрыторыі сельскага Савета. Пра мястэчка Лужкі і яго жыхароў у гады Вялікай Айчыннай вайны расказала намеснік дырэктара школы па вучэбнай рабоце Зоя Огінава. Далёка за межамі нашай краіны вядомы імёны Эміліі Плятэр, Эліэзера Бэн-Іегуды, Усевалада Шырана, Васіля Стомы, Віктара Праўдзіна і іншых знакамітых ураджэнцаў Лужкоў і людзей, якія звязалі свой жыццёвы шлях з гэтым мястэчкам. Пра іх удзельнікам канферэнцыі расказала бібліятэкар Лена Гугалінская. Падводзячы вынікі сустрэчы, Ірына Машара падкрэсліла, што дадзеная канферэнцыя, якая з’яўляецца вынікам збору і сістэматызацыі мясцовай інфармацыі па краязнаўстве, у далейшым будзе садзейнічаць зберажэнню і павелічэнню нацыянальнага духоўнага культурнага здабытку, гістарычнай спадчыны і самабытных традыцый мясцовага насельніцтва.

Сяргей РАЙЧОНАК