У адпаведнасці з Указам Прэзідэнта Рэспублікі Беларусь, штогод у другую нядзелю мая адзначаецца дзяржаўнае свята — Дзень Дзяржаўнага герба і Дзяржаўнага сцяга Рэспублікі Беларусь.

Герб, сцяг і гімн аб’ядноўваюць беларусаў. Да гэтай урачыстай даты прымеркавана рэспубліканская маладзёжная акцыя “Квітней, Беларусь!”, якая ўзяла эстафету ў акцыі “Дзякуй за Перамогу”. Прайшла яна пад эгідай ГА “Беларускі рэспубліканскі саюз моладзі”.

Мерапрыемства ў рамках акцыі адбылося і ў нашым раёне. У ім прынялі ўдзел маладыя людзі — члены БРСМ. Вечарам 11 мая юнакі і дзяўчаты раёна сталі ўдзельнікамі флэш-моба “Жывы сцяг”, арганізаванага раённым камітэтам ГА БРСМ. Члены пярвічкі Шаркаўшчынскай СШ № 2 з паветранымі шарыкамі пад колер сцяга ўзняліся на сцэну летняга амфітэатра. Вядучыя паведамілі аб нашай беларускай сімволіцы. Затым прагучаў гімн Рэспублікі Беларусь.

Удзельнікі акцыі ўсклалі кветкі да помніка загінуўшым воінам на плошчы Леніна. Закончылася мерапрыемства канцэртам мастацкай самадзейнасці і тэматычнай дыскатэкай.

Кацярына СОСНА