Напярэдадні галоўнага дзяржаўнага свята — Дня Незалежнасці — Прэзідэнт краіны Аляксандр Рыгоравіч Лукашэнка па даўняй традыцыі ўручыў дзяржаўныя ўзнагароды. У Палац Незалежнасці былі запрошаны ваеннаслужачыя, дзеячы культуры і мастацтва, педагогі, медыкі, спартсмены, работнікі аграпрамысловага комплексу. Аграрная вытворчасць — у ліку асноўных галін беларускай эканомікі. Таму самую шматлікую групу ўзнагароджаных прадстаўлялі працаўнікі гэтай сферы. Сярод іх — механізатар адкрытага акцыянернага таварыства “Даватарскі” Шаркаўшчынскага раёна Мікалай Дарашчонак. Імя гэтага паважанага чалавека добра вядома шаркаўчанам. Усю сваю працоўную дзейнасць Мікалай прысвяціў роднаму сельгаспрадпрыемству: спачатку працаваў вадзіцелем грузавога аўтамабіля, пасля намотваў кіламетры па раёне і за яго межамі на “легкавушцы”, апошнія некалькі год Мікалай выконвае розныя віды работ у сельгаспрадпрыемстве на энерганасычаным МТЗ-3022. За сваю добрасумленную працу мае ўзнагароды ад кіраўніцтва гаспадаркі, раённага выканаўчага камітэта. Па выніках работы за 2014 год Мікалай Дарашчонак стаў лаўрэатам Ганаровага звання “Чалавек года Шаркаўшчыны” у намінацыі “сельская гаспадарка”. І зараз чарговая прыемная навіна не толькі для перадавіка, але і ўсяго Шаркаўшчынскага раёна. 29 чэрвеня Мікалаю Дарашчонку Прэзідэнт асабіста ўручыў Ордэн Пашаны. Кіраўнік краіны павіншаваў таксама ўсіх з Днём Незалежнасці і пажадаў, каб гэтыя ўзнагароды не былі апошнімі. Віншуем нашага земляка з гэтай адметнай падзеяй у жыцці і жадаем яму ў далейшым новых працоўных поспехаў і ўдач! 

Сяргей РАЙЧОНАК