Семдзясят трэцяй гадавіне знішчэння жыхароў спаленых вёсак прысвячаўся мітынг-рэквіем, які прайшоў 26 кастрычніка каля брацкай магілы ў аграгарадку Шыці. На мерапрыемстве прысутнічалі мясцовыя жыхары, прадстаўнікі адміністрацыі ААТ “Буеўшчына”, настаўнікі і вучні Лонскай дзіцячы сад—пачатковай школы, вязні фашысцкіх канцлагераў, ветэраны працы.

Малебен на месцы пахавання 248 мірных жыхароў спаленых вёсак і 16 воінаў Чырвонай Арміі адслужыў настаяцель Свята-Успенскай царквы айцец Васілій Стрыжнёў. Свяшчэннік благаславіў і акрапіў святой вадою брацкую магілу і помнік, звярнуўся са словамі пропаведзі да людзей сталага пакалення і моладзі.

Намеснік старшыні раённага выканаўчага камітэта Юрый Анатольевіч Васілеўскі ў сваёй прамове адзначыў, што адной з форм генацыду ў адносінах да беларускага народа ў часы Вялікай Айчыннай вайны з боку гітлераўскіх захопнікаў было масавае знішчэнне мірнага насельніцтва і спальванне вёсак. Лёс сумна вядомай Хатыні раздзялілі і 23 населеныя пункты Шаркаўшчынскага раёна. 10 вёсак і хутароў пасля вайны так і не адрадзіліся. Юрый Анатольевіч, звяртаючыся да прысутных, заклікаў цаніць кожны дзень жыцця пад мірным небам у свабоднай і незалежнай Беларусі.

Мітынг-рэквіем закончыўся ўскладаннем кветак і вянкоў да помніка загінуўшым і хвілінай маўчання.