10 чэрвеня на базе цэнтральнай раённай бальніцы прайшла абласная навукова-практычная канферэнцыя на тэму: “Роля ўрагенітальных інфекцый у рэпрадукцыйным здароўі – як фактар дэмаграфічнай бяспекі рэгіёну”. Удзел у ёй прынялі ўрачы-дэрматавенеролагі і акушэры-гінеколагі медыцынскіх устаноў вобласці. Адкрыў канферэнцыю і выступіў па асноўнаму пытанню галоўны ўрач Віцебскага абласнога скурна-венералагічнага дыспансера В. Спірыдонаў. Пра арганізацыю медыцынскай дапамогі насельніцтву Шаркаўшчынскага раёна прысутным паведаміў галоўны ўрач цэнтральнай раённай бальніцы С. Стома. З дакладамі таксама выступілі дацэнт кафедры дэрматавенералогіі Беларускай медыцынскай акадэміі паслядэпломнай адукацыі І. Шыманская, навукоўцы з Віцебскага дзяржаўнага медыцынскага ўніверсітэта і Віцебскага абласнога скурна-венералагічнага дыспансера.

У другой практычнай частцы канферэнцыі яе ўдзельнікі змаглі ўбачыць дэманстрацыю сеанса тэлемедыцыны, правядзенне дыягнастычнай дэрматаскапіі, а таксама даведацца пра арганізацыю акушэрска-гінекалагічнай дапамогі ад спецыялістаў Шаркаўшчынскай ЦРБ З. Сакаловіч і А. Цішонак. Пасля практыкума за круглым сталом былі падведзены вынікі сустрэчы, абмеркаваны шматлікія пытанні дэмаграфічнай бяспекі насельніцтва, пастаўлены канкрэтныя задачы перад спецыялістамі медыцынскіх устаноў.

Удзел ў рабоце абласной навукова-практычнай канферэнцыі прыняў намеснік старшыні Шаркаўшчынскага раённага выканаўчага камітэта Ю. Васілеўскі.

Сяргей РАЙЧОНАК