16 июля 2015

На малочнатаварнай ферме “Наваселле” ААТ “Агратэхсэрвіс”

Малочнатаварная ферма “Наваселле” ААТ “Агратэхсэрвіс” налічвае 220 кароў. Іх абслугоўваюць чатыры пастаянныя даяркі — Галіна Пузырэўская, Валянціна Рачыцкая, Алена Рымдзёнак, Наталля Ясюкевіч і адна падменная — Ірэна Ветрыненя. Самы высокі сярэдні паказчык па надоях у Валянціны Рачыцкай, ён складае 15,6 кілаграмаў малака на карову. Крыху меней у Галіны Пузырэўскай — 13,8 кг. Такі ж і сярэдні паказчык па малочнатаварнай ферме. На 14 ліпеня па ферме надоена 6170 кілаграмаў малака. Паказчык немалы, але магло быць і больш. Частка малака ідзе на выпайку цялятам. У ліпені ў гурце было 8 расцёлаў. Пасля таго, як маленькія цяляты 21 дзень пабудуць на пашы, іх адвозяць на далейшае ўтрыманне ў спецыяльна падрыхтаванае памяшканне фермы. Заўсёды пільна сочыць за якасцю малака лабарант Ядзвіга Міронава. Старанна адносіцца да даручанай справы і майстар па штучным асемяненні жывёлы Юрый Рачыцкі. Дзякуючы іх карпатлівай рабоце і паказчыкі па расцёлах высокія, і якасць малака заўсёды на належным узроўні. А для таго, каб статак заўсёды пасвіўся на свежай адрошчанай траве, клапоцяцца пастухі Сямён Сямёнаў і Мар’ян Вялічка, якія своечасова адводзяць новыя загоны для скормлівання каровам.

Вось так, з захаваннем усіх патрэбных тэхналогій працуюць спецыялісты сярэдняга звяна і работнікі малочнатаварнай фермы “Наваселле” ААТ “Агратэхсэрвіс”, каб атрымаць максімальны прыбытак ад жывёлагадоўлі ў “перыяд вялікага малака”.

Сяргей РАЙЧОНАК