4 і 5 чэрвеня ў межах беларускага аграпрамысловага тыдня “Белагра-2015” адбыўся конкурс аратых. Традыцыйныя спаборніцтвы праводзяцца ўжо на працягу трох год. Сёлета ў іх прынялі ўдзел лепшыя механізатары сельгаспрадпрыемстваў краіны (па 4 чалавекі ад кожнай вобласці), аб’яднаныя каманды Беларускай дзяржаўнай сельгасакадэміі, Беларускага дзяржаўнага аграрна-тэхнічнага ўніверсітэта і рэспубліканскага аб’яднання “Белаграсэрвіс”. Паспрачацца за званне лепшага аратага краіны вырашыў і перадавы механізатар ААТ “Шаркаўшчынскі агратэхсэрвіс” Іван Мацяс. Конкурс праходзіў у двух намінацыях у тры этапы. Спачатку механізатары здавалі тэарэтычныя экзамены. На другім этапе ўдзельнікі павінны былі здаць практычны экзамен па манеўровым ваджэнні трактара. Кіруючы МТЗ-1523 або МТЗ-3022 з прычэпам, яны выконвалі заезды ў гараж, на эстакаду, адпрацоўвалі элемент “змейка” і г.д. У заключным конкурсным этапе механізатары спаборнічалі зноў жа на розных марках трактараў: МТЗ-1523 у счэпе з 5-корпусным плугам і МТЗ-3022 у счэпе з 8-корпусным плугам. Гэты этап з’яўляўся самым галоўным і самым складаным, бо толькі ад высокага прафесійнага майстэрства трактарыстаў залежала якаснае ўзорванне адведзенага ўчастка поля і перамога ў конкурсе. Журы пасля падвядзення вынікаў рэспубліканскага спаборніцтва прысудзіла трэцяе месца нашаму земляку Івану Мацясу. З вялікага мноства высокакваліфікаваных механізатараў краіны “бронзавую” прыступку гэтага маштабнага конкурсу шаркаўчаніну ўдалося дасягнуць толькі дзякуючы яго нястомнай і стараннай працы. Пасля вяртання з тэрміновай вайсковай службы ў 1990 годзе ў родныя мясціны Іван нязменна шчыруе ў родным сельгаспрадпрыемстве. З той пары дасканала асвоіў усе маркі трактараў “Беларус”. Зараз у механізатара энерганасычаны МТЗ-3022, на якім у перыяд зялёнага жніва Іван скошвае травы ў счэпе з дзевяціметровай касілкай КПР-9, перавыконвае працоўныя нормы дзеля дабрабыту гаспадаркі і яе работнікаў. 

Сяргей РАЙЧОНАК.