21 верасня, у дзень Раства Прасвятой Багародзіцы праваслаўныя вернікі ў Лужках адзначылі прастольнае свята. З светлым урачыстым настроем сабраліся прыхаджане з Лужкоў і навакольных вёсак на святочную літургію ў царкве Раства Прасвятой Багародзіцы. Пасля набажэнства адбыўся хрэсны ход са святыняй — іконай Раства Прасвятой Багародзіцы. Урачыстая працэсія прайшла з малітвамі па вуліцах Лужкоў, спынілася ля помніка на брацкай магіле савецкіх воінаў, дзе была адслужана памінальная ліція. Свята сабрала многа вернікаў з усёй акругі, таксама былі запрошаны свяшчэннікі з гарадскога пасёлка, суседніх раёнаў, прадстаўнікі ўладаў. Святочныя мерапрыемствы таксама прымеркаваны да 220-гадовага юбілею Лужкаўскай царквы.

На свяце прысутнічаў намеснік старшыні райвыканкама Юрый Анатольевіч Васілеўскі, які перадаў вернікам і царкоўнаслужыцелям віншаванні старшыні раённага выканаўчага камітэта з нагоды гэтай важнай падзеі ў іх духоўным жыцці, і уручыў падарунак ад кіраўніцтва раёна.

Андрэй БУРЭЦ