З самага ранку 22 жніўня ў Алашкі пачалі прыязджаць госці і ўдзельнікі чарговага фестывалю, прысвечанага садаводу-селекцыянеру Івану Паўлавічу Сікору. У размеранае жыццё невялікай вёскі на Яблычны Спас увайшоў святочны гоман з музыкай, песнямі і ўсім, з чым асацыіруецца сапраўднае народнае гулянне. “Яблычны фэст”, які сёлета атрымаў такую назву, прайшоў на радзіме славутага садавода з асаблівым размахам. Свята набыло абласны маштаб, таму і госці ў Алашкі завіталі з усёй Віцебшчыны. Пабачыць мясцовыя маляўнічыя краявіды, акунуцца ў атмасферу фестывалю прыехалі людзі з усіх рэгіёнаў нашай краіны і з замежжа: Украіны, Расіі, краін Прыбалтыкі.

 Мерапрыемства праходзіла на пяці пляцоўках. Адкрыў свята раённы этап рэспубліканскага конкурсу “Уладар сяла”, у якім спаборнічалі 13 маладых сем’яў. На беразе мясцовага возера самадзейныя артысты Іёдскага сельскага Дома культуры і Каўшэлеўскага Дома фальклору правялі казачную праграму з Нептунам і Русалкай — насельнікамі азёрных і марскіх глыбіняў. Тут жа можна было пакаштаваць смачнай юшкі і пакатацца па азёрнай гладзі на вялікіх ладдзях.

 Побач з домам-музеем І. П. Сікоры свае гасцінныя і смачныя прысмакі дэманстравалі кулінарныя клубы нацыянальных кухань Віцебшчыны. Усе стравы былі прыгатаваныя з садавіны, аснову якой складаў, канечне ж, яблык. Дастойна сярод іншых выглядалі і нашы землякі — народны клуб нацыянальнай кухні “Груца” Радзюкоўскага СДК і аматарскае аб’яднанне кухні, гульні і абрадаў “Стараверскія страпухі” Більдзюжскага СДК, якія частавалі гасцей свята шаркаўшчынскімі адметнымі стравамі. І вось у дванаццаць гадзін на галоўнай фестывальнай пляцоўцы прагучалі фанфары — пачалося свята “Яблычны фэст”. Да прысутных з прывітальным словам звярнуўся старшыня Шаркаўшчынскага райвыканкама М. І. Баговіч. Мікалай Ірынархавіч пажадаў атрымаць ад свята мноства яркіх уражанняў, выдатнага настрою і невычэрпнага натхнення.

 Летась у Алашкі на свята завіталі госці з Даўгаўпілса. А сёлета “Яблычны фэст” наведала дэлегацыя з гэтага латвійскага горада на чале з кіраўніком упраўлення культуры краёвай Думы Інарай Муканэ. Замежныя госці прыехалі з падарункамі, а таксама прывезлі з сабой адзін з лепшых танцавальных калектываў Латвіі — ансамбль народнага танца “Даўгавеня”, які прадэманстраваў сваё майстэрства на алашкаўскай сцэне.

 Шмат цёплых слоў арганізатарам свята было адрасавана ад прадстаўнікоў дэлегацый-ўдзельнікаў “Яблычнага фэста”, як і вялікае мноства памятных падарункаў, уручаных кіраўніцтву раёна і музею Івана Сікоры.

 Ва ўрачыстай абстаноўцы на галоўнай сцэне словы малітвы прачытаў протаіерэй айцец Віктар Валашчук, а дабрачынны Шаркаўшчынскай акругі айцец Пётр Бараноўскі асвяціў дары сікораўскага саду і акрапіў святой вадою прысутных людзей.

 Цікавую літаратурна-музычную гасцёўню “У гасцях у Сікоры”, прысвечаную 130-годдзю з дня яго нараджэння, правялі разам з паэтамі, пісьменнікамі і музыкантамі вобласці спецыялісты раённага цэнтра культуры. А побач, у зацені яблыневага саду, жадаючыя маглі пазнаёміцца з выставамі творчых работ клубаў прыродазнаўчага накірунку ўстаноў культуры вобласці, паўдзельнічаць у майстар-класах па лозапляценні і гульні ў шашкі.

 Вялікае мноства забаў было прадастаўлена для маленькіх гасцей свята: атракцыёны, цацкі, жартоўныя конкурсы, катанне на конях, катамаранах і нават стральба з пнеўматычнай вінтоўкі ў абсталяваным ціры. З удзелам старшыні райвыканкама госці свята змаглі ўласнымі рукамі стварыць брэнд Шаркаўшчыны. На вялікі стэнд кожны па чарзе прымацоўваў яблыкі, у выніку была створана прыгожая кампазіцыя “Шаркаўшчына запрашае!”

 Кульмінацыяй фестывалю стаў урачысты роспіс маладой пары. У той дзень у сікораўскім садзе зарэгістраваць свой шлюб вырашылі Арцём Тарасёнак і Лалэ Гуліева, з чым іх асабіста павіншаваў Мікалай Ірынархавіч Баговіч. А пасля жартоўныя выпрабаванні для маладых і гасцей вяселля правялі культработнікі і Дзядзька Язэп, у ролі якога выступіў Іосіф Квач. Сонца павольна хавала свае цёплыя промні за небасхіл, а ў Алашках ажно да змяркання гучалі музыка і песні, ніхто не хацеў развітвацца. Усе з вялікім нецярпеннем чакаюць наступнага “Яблычнага фэсту”, які абавязкова збярэ ў будучым годзе ў сікораўскім садзе сваіх сяброў.

Сяргей РАЙЧОНАК.