6 января 2017

Цікавыя сустрэчы: Раство – у сэрцы кожнага з нас

У раённай дзіцячай бібліятэцы прайшло цікавае мерапрыемства, якое разам са сваімі калегамі арганізавала і правяла бібліятэкар дзіцячай бібліятэкі Людміла Аляксандраўна Казіцкая. Удзельнікамі святочнай праграмы сталі вучні Шаркаўшчынскай дзіцячай школы мастацтваў.

У раённай дзіцячай бібліятэцы прайшло цікавае мерапрыемства, якое разам са сваімі калегамі арганізавала і правяла бібліятэкар дзіцячай бібліятэкі Людміла Аляксандраўна Казіцкая. Удзельнікамі святочнай праграмы сталі вучні Шаркаўшчынскай дзіцячай школы мастацтваў. Падчас сустрэчы ў бібліятэцы дзеці даведаліся, што Раство — гэта не толькі вясёлыя забавы і падарункі пад ёлкай. Пра самыя значныя моманты галоўнага хрысціянскага свята хлопчыкам і дзяўчынкам у даступнай форме расказаў настаяцель храма “Усіх смуткуючых Радасць”, пратаіерэй Віктар Валашчук. Вядучая мерапрыемства Людміла Казіцкая пазнаёміла ўдзельнікаў святочнай праграмы з выставай работ ручной працы “Карункі Раства”, на якой прадстаўлены “выцінанкі” — мастацкае выразанне ўзораў на паперы. Выцінанкамі нашы продкі даволі часта ўпрыгожвалі свой дом напярэдадні святаў. На цікавай выставе ў бібліятэцы дзеці ўбачылі работы, аўтарамі якіх з’яўляюцца шаркаўчанкі Людміла Казіцкая і Святлана Заіка.

Дзеці пазнаёміліся з кніжнай выставай, абмеркавалі змест некаторых твораў, прадстаўленых на ёй, больш даведаліся пра кнігі, якія варта пачытаць самім.

Атмасфера цудоўнага свята нараджэння Хрыстова адчувалася на працягу ўсяго мерапрыемства, падчас якога дзеці спявалі песні і запальвалі свечкі, якія таксама з’яўляюцца сімвалам Раства і абазначаюць нашу сувязь з Богам. Шмат цікавай інфармацыі можна было даведацца ў гэты дзень як дзецям, так і дарослым. Напрыканцы сустрэчы дзеці пачаставаліся яблыкамі, а вядучая мерапрыемства ўручыла настаяцелю храма Віктару Валашчуку калядныя зорачкі ручной работы, якія напярэдадні Раства ўпрыгожаць храм іконы Божай маці “Усіх смуткуючых Радасць”.

Вольга ЧАРНЯЎСКАЯ.