Перад прысутнымі выступіў дырэктар сельгаспрадпрыемства Міхаіл Барысавіч Кавалёнак. ААТ “Агратэхсэрвіс” з’яўляецца самай буйной гаспадаркай у раёне. Прадпрыемству належыць 10.500 гектараў зямлі. 7.000 га складае ворыва. Налічваецца 5.500 галоў буйной рагатай жывёлы, з іх дойны статак складае 1.600 галоў. У машынна-трактарным парку гаспадаркі маецца 60 адзінак трактароў, 40 аўтамабіляў, 11 зернеўборачных камбайнаў і 3 корманарыхтоўчыя комплексы. Сёлета пад зерневымі і зернебабовымі культурамі было занята 2.518 га. Агульны намалот збожжа ў бункернай вазе склаў 5.056 тон, што вышэй мінулагодняга паказчыка. Сярэдняя ўраджайнасць склала амаль 30 цэнтнераў з гектара. Рапсу сабралі 287 тон пры ўраджайнасці 11,3 ц/га. Па гаспадарцы валавы надой малака склаў 3.117 тон. Атрымана ад буйной рагатай жывёлы 492 тоны мяса.З-за складаных кліматычных умоў нарыхтавана кармоў менш запланаванага паказчыка. Закладзена ў траншэі 17.800 тон сенажу і 2.000 тон сіласу, нарыхтавана 1.188 тон сена. 

Як зазначыў кіраўнік сельгаспрадпрыемства, сёлета ў зімова-стойлавы перыяд трэба асабліва эканомна расходаваць кармы, бо іх не хапае не толькі ў гаспадарках раёна, але і ў вобласці. Міхаіл Барысавіч шчыра падзякаваў работнікам гаспадаркі за іх нястомную працу, павіншаваў з прафесійным святам. А якое ж свята без падарункаў? Дырэктар узнагародзіў грашовымі прэміямі і каштоўнымі падарункамі лепшых працаўнікоў адкрытага акцыянернага таварыства — усяго 55 чалавек. 

У госці да працаўнікоў “Агратэхсэрвіса” завіталі з канцэртнай праграмай работнікі культуры. Цудоўная музыка і песні гучалі са сцэны для вяскоўцаў, якія падпявалі самадзейным артыстам, з ахвотай удзельнічалі ў жартоўных конкурсах. 

Сяргей РАЙЧОНАК