Сёлета спаўняецца 25 гадоў з моманту заснавання грамадскага аб’яднання “Беларускае таварыства інвалідаў”. Гэтай падзеі прысвечаны шэраг мерапрыемстваў, якія праводзяцца ў рэспубліцы. Адно з іх — святочны канцэрт у межах акцыі “У будучыню — разам” — прайшоў у Шаркаўшчынскім РДК. Распачаў канцэрт шаноўны госць — старшыня Цэнтральнага праўлення аб’яднання Уладзімір Пятровіч Патапенка, які павіншаваў прысутных са святочнай падзеяй і заклікаў людзей з абмежаванымі магчымасцямі весці актыўнае жыццё, у тым ліку, і творчае. Пасля гэтага на сцэне выступілі самадзейныя артысты: шаркаўчане, а таксама госці з Браслава, Пастаў і Міёр. Яны паспяхова спраўляліся з хваляваннем, а гледачы падтрымлівалі іх шчырымі апладысментамі. Таксама падчас мерапрыемства ў фае Дома культуры праходзіла выстава творчых работ шаркаўчан і гасцей, якая наглядна даказвала, што абмежаваныя магчымасці не перашкаджаюць ствараць прыгожае. На сходе з удзелам гасцей з вобласці і рэспублікі старшынёй раённай арганізацыі ГА “Беларускае таварыства інвалідаў” была абрана Вера Уладзіміраўна Хаданёнак.

Андрэй Бурэц