10 февраля 2021

Уладзімір Матвееў правёў «прамую тэлефонную лінію» і прыём грамадзян Лужкаўскага сельскага Савета

У чарговы раз наш раён з рабочым візітам наведаў член Савета Рэспублікі Нацыянальнага сходу Рэспублікі Беларусь, генеральны дырэктар камунальнага праектна-рамонтна-будаўнічага ўнітарнага прадпрыемства “Віцебскаблдарбуд” Уладзімір Матвееў.

Уладзімір Сямёнавіч правёў “прамую тэлефонную лінію” і прыём грамадзян Лужкаўскага сельскага Савета.

На прыём да дэпутата прыйшлі прадстаўнікі сферы медыцыны аграгарадка Лужкі. Мясцовая бальніца сястрынскага догляду ўведзена ў эксплуатацыю ў 1990 годзе і з таго часу перыядычна праводзіцца толькі касметычны рамонт. На самой жа справе будынак установы аховы здароўя патрабуе капітальнага рамонту.

У сувязі з тым, што насельніцтва аграгарадка і навакольных вёсак змяншаецца, у іх пражывае значная колькасць састарэлых грамадзян, паўстае пытанне аб пераводзе ўстановы аховы здароўя ў катэгорыю хоспісу. Хоспіс — медыка-сацыяльная ўстанова для аказання паліатыўнай (паляпшэнне якасці жыцця пацыентаў) дапамогі невылечным хворым (пераважна анкалагічным) у апошняй стадыі захворвання.

Разам з тым рамонту патрабуе і прылеглая да ўстановы аховы здароўя тэрыторыя. У прыватнасці, асфальта-бетоннае пакрыццё пад’яздных шляхоў, дарожак.

Уладзімр Сямёнавіч уважліва выслухаў прысутных, паабяцаў дэталёва разабрацца па кожным пытанні і абавязкова аказаць садзейнічанне ў вырашэнні праблем, якія маюцца ў Лужкаўскай бальніцы сястрынскага догляду.

Сяргей РАЙЧОНАК.