29 января, Шарковщина /Соб.инф./. 28 студзеня ў спартыўнай зале РДК стартаваў чэмпіянат раёна па валейболу ў першай лізе сярод мужчын памяці Э. А. Корсака. Жыхарам раёна добра вядома імя гэтага чалавека — Эдуард Аляксандравіч на працягу 17 гадоў працаваў галоўным рэдактарам раённай газеты “Кліч Радзімы” і ўсё жыццё актыўна займаўся спортам. Асабліва любіў гэты таленавіты кіраўнік і журналіст валейбол і настольны тэніс. Эдуард Аляксандравіч шмат гадоў выступаў за каманду райвыканкама па валейболу, якая дэманстравала выдатную гульню падчас чэмпіянату раёна.

Аўтарамі ідэі правядзення гэтага спартыўнага свята памяці Э. А. Корсака сталі начальнік аддзела фізкультуры, спорту і турызму райвыканкама С. Л. Каплуноўскі і начальнік аддзела па справах моладзі райвыканкама І. А. Іваноў.

Турнір пройдзе з 28 студзеня па 12 лютага. Удзел у ім прымуць каманды ААТ “Княж”, РАУС, аддзялення Дэпартамента аховы, райвыканкама, ДБУ-26, СШ № 1.

Аляксандр БАРЫЛА