У другі дзень лютага ў актавай зале раённага аддзела па надзвычайных сітуацыях сабраліся афіцэры і асабовы састаў РАНС з нагоды юбілея былога супрацоўніка — Сяргея Іванавіча Шошына. Напярэдадні ён адзначыў 50-годдзе з дня свайго нараджэння. Сяргей Іванавіч пасля заканчэння Львоўскага пажарна-тэхнічнага вучылішча ў 1993 годзе пачаў сваю працоўную дзейнасць у пажарным наглядзе аддзела ўнутраных спраў Шаркаўшчынскага райвыканкама. У 1998 годзе ён становіцца начальнікам каравула, а з 2005 года і да выхаду на заслужаны адпачынак Сяргей Іванавіч з’яўляўся інспектарам інспекцыі дзяржаўнага пажарнага нагляду Шаркаўшчынскага РАНС. Сяргей Іванавіч не проста з’яўляўся дысцыплінаваным і кваліфікаваным спецыялістам, з яго яшчэ бралі прыклад маладыя калегі, таму што вопытны работнік заўсёды прымаў актыўны ўдзел у распрацоўцы мерапрыемстваў па забеспячэнні пажарнай бяспекі, значную ўвагу надаваў прафілактычнай рабоце па прадухіленні пажараў пры непасрэдных сустрэчах з кіраўнікамі і працоўнымі калектывамі прадпрыемстваў, арганізацый і ўстаноў раёна. Нават цяпер, калі Сяргей Іванавіч знаходзіцца на заслужаным адпачынку, ён займае актыўную грамадзянскую пазіцыю, узначальвае Шаркаўшчынскае раённае аддзяленне Беларускай грамадскай арганізацыі ветэранаў органаў і падраздзяленняў па надзвычайных сітуацыях “Выратавальнік”. Былыя саслужыўцы, ведаючы пра захапленне юбіляра, - рыбалку – уручылі Сяргею Іванавічу адпаведны падарунак — зімовы і летні касцюмы рыбалова і пажадалі: “Ні хваста, ні лускі!”

Сяргей РАЙЧОНАК.