Па ўмовах аператыўнага працоўнага спаборніцтва, камбайнер, які першы намалаціў 500 тон збожжа, і вадзіцель, які столькі ж тон перавёз з поля на збожжаток, дастойныя ўшанавання. Аднымі з першых прымалі віншаванні працаўнікі хлебнай нівы КУВСП “Гарадзец”. Па ўмовах унутрыгаспадарчага працоўнага спаборніцтва вадзіцель МАЗ-555 Пётр Баркоўскі трымае лідарства. Намеснік дырэктара гаспадаркі па ідэалагічнай рабоце Наталля Катушонак уручыла Пятру Генрыхавічу пераходны чырвоны сцяжок і грашовую прэмію. 500 тон намалаціў камбайнер Аляксандр Морхат. Старшыня райкама прафсаюза работнікаў аграпрамысловага комплексу Гедзіён Буйка ўручыў стараннаму працаўніку Ганаровую грамату, грашовую прэмію, кепку і майку з лагатыпам Федэрацыі прафсаюзаў Беларусі. Наталля Віктараўна ў сваю чаргу ўручыла падарункі ад дырэкцыі і прафсаюзнай арганізацыі гаспадаркі. Ударнікі атрымалі падарункі, а іх тэхніку ўпрыгожылі сцяжкі лідараў, каб іншыя бачылі, на каго раўняцца. А вось на адвозцы збожжа ад камбайнаў першым у раёне вызначыўся  вадзіцель з ААТ “Княж” Мікалай Сяліцкі. Ён таксама заслужыў узнагароду ад райкама прафсаюза работнікаў аграпрамысловага комплексу.

Кацярына СОСНА