Сваё прафесійнае свята работнікі камунальнай службы раёна адзначылі 22 сакавіка. А напярэдадні, 20 сакавіка, у актавай зале адміністрацыйнага будынка УКП ЖКГ прайшоў выніковы сход работнікаў камунальнай гаспадаркі за 2014 год. З асноўным дакладам выступіў дырэктар УКП ЖКГ В. Ф. Бука, які паведаміў аб зробленай рабоце за мінулы год, акрэсліў планы і задачы на 2015 год. Дзейнасць камунальнай гаспадаркі шматгаліновая. Гэта не толькі абслугоўванне жылога фонду, цепла- і водазабеспячэнне. Камунгас займаецца яшчэ і добраўпарадкаваннем вуліц гарадскога пасёлка, вырабам агароджаў, вырошчваннем расады кветак, аказаннем рытуальных паслуг і г. д. У рабоце выніковага сходу прыняў удзел старшыня раённага выканаўчага камітэта М. І. Баговіч. Мікалай Ірынархавіч адзначыў, што жыллёва-камунальная гаспадарка цесна звязана са стварэннем камфортных умоў пражывання насельніцтва, забеспячэннем жыццядзейнасці прадпрыемстваў і ўстаноў. Дабрабыт жыхароў у многім залежыць ад устойлівасці і надзейнасці дадзенай сферы, ад адказнасці людзей, якія тут працуюць. Кіраўнік раёна ўручыў лепшым работнікам жыллёва-камунальнай гаспадаркі Падзякі старшыні райвыканкама. Шэраг працаўнікоў па выніках работы за мінулы год адзначаны Ганаровымі граматамі, грашовымі прэміямі і каштоўнымі падарункамі. 

Сяргей РАЙЧОНАК.