У раённым Цэнтры рамёстваў пачала працу чарговая мастацкая выстава. На гэты раз шаркаўчанам пашчасціла пазнаёміцца з творчымі работамі старшыні абласной арганізацыі Беларускага саюза мастакоў Святланы Баранкоўскай. 

Аўтар працуе пераважна ў мастацкім тэкстылі і ручным ткацтве, стварае сцэнічныя касцюмы, піша кампазіцыі ў тэхніцы алейнага жывапісу. Аднак найбольш паспяхова талент мастака праявіўся ў стварэнні габеленаў, на якіх Святлана адлюстроўвае гістарычнае мінулае Беларусі, славутых землякоў. У шэрагу твораў аўтар звяртаецца да архаічных матываў, увасабляе ў сімвалічных вобразах веліч і спакой хрысціянскіх святыняў. 

Назва выставы “Rad№0” з’яўляецца нейкай своеасаблівай філасофскай крыніцай у яе творчасці. Так радно ператвараецца ў карціну жыцця, якая абуджае памяць і свядомасць беларусаў, адкрывае прастору для душэўнай размовы людзей, пра сваё асабістае, пра сваё роднае. 

Прадстаўленыя ў экспазіцыі габелены, толькі часткова знаёмяць з творчасцю Святланы Баранкоўскай, але і яны досыць глыбока адлюстроўваюць светапогляд аўтара. Гэта серыі партрэтаў славутых дзеячаў айчыннай культуры Янкі Купалы, Васіля Быкава, Рыгора Барадуліна, Уладзіміра Караткевіча, Язэпа Драздовіча, творы для дзяцей “Вясёлка”, тканая азбука. У аснове некаторых палотнаў замест нітак — палоскі з газет і часопісаў.

У гутарцы з гледачамі Святлана Баранкоўская сказала, што вельмі любіць сваю мову, краіну, свой народ і ўсіх людзей на гэтай зямлі. Яна імкнецца берагчы і шанаваць спадчыну і культурныя здабыткі мінулых вякоў, каб потым усё гэта данесці да гледача ў сваіх палотнах.

На адкрыцці выставы прысутнічала многа сяброў і знаёмых Святланы Баранкоўскай, якія адзначылі, што мастацтва аўтара вельмі актуальнае, бо адлюстроўвае праблемы сучаснасці. 

Выстава габеленаў Святланы Баранкоўскай “Rad№0” будзе працаваць у Цэнтры рамёстваў на працягу месяца, таму ўсе жадаючыя могуць скарыстаць выдатную магчымасць, каб уласна пазнаёміцца з творамі знакамітага мастака.

Сяргей РАЙЧОНАК.