27 марта 2026

Нагадалі аб пажарнай бяспецы

І для ратавальнікаў і для школьнікаў ужо стала добрай традыцыяй наведванне падчас канікулаў падраздзяленняў МНС. Падобныя візіты заўсёды выклікаюць у дзяцей непадробную цікавасць і дораць масу станоўчых эмоцый.

Штодня падчас школьных канікулаў дзеці прыходзілі на экскурсію і ўрокі бяспекі ў пажарную аварыйна-выратавальную часць № 1 гарадскога пасёлка Шаркаўшчына. Ратавальнікі з радасцю знаёмілі юных гасцей з работай падраздзялення. Работнікі МНС расказалі аб наяўных у распараджэнні частцы пажарных аўтамабіляў, іх уладкаванні і абсталяванні, растлумачылі, як прымаюцца паведамленні аб здарэннях, а таксама апісалі распарадак дня ратавальнікаў.

Не абышлося і без напамінку аб важных правілах бяспекі, актуальных як у школе, так і дома. Інспектар сектара прапаганды і ўзаемадзеяння з грамадскасцю Крысціна Абрамчык расказала аб рызыках вясновага перыяду. Разам з ратавальнікамі хлопцы паўтарылі нумары экстранных службаў і прайшлі «5 крокаў выратавання».

Таксама ратавальнікі праехалі па маршруце аўтакрамы ў некалькіх населеных пунктах раёна. Мэта дадзенага мерапрыемства — у пажаранебяспечны перыяд нагадаць вяскоўцам аб важных правілах бяспекі пры навядзенні парадку на прыдамавых тэрыторыях.

— Жаданне людзей навесці парадак на сваім участку шляхам спальвання сухой расліннасці, часцей за ўсё нясе толькі разбурэнні і матэрыяльныя страты. Разбушавалася полымя цяжка спыніць, а пацярпець можа не толькі маёмасць, але і сам падпальшчык. Часам выпальвання сухой травы могуць прывесці і да гібелі людзей. Таму, мы настойліва рэкамендуем устрымацца ад навядзення парадку ў двары шляхам выпальвання леташняй травы, — менавіта з такімі парадамі ратавальнікі звярталіся да наведвальнікаў крамы на колах.