Звыш 40 праектаў ад больш за 10 прадпрыемстваў Віцебскай вобласці будзе прадстаўлена на выставе "Беларусь інтэлектуальная", якая пройдзе ў Віцебску з 3 па 5 сакавіка.

З дасягненнямі беларускай навукі жыхары і госці паўночнага рэгіёна змогуць азнаёміцца ў футбольным манежы. Выстава прадставіць найноўшыя распрацоўкі і перадавыя тэхналогіі розных сфер жыццядзейнасці, прадэманструе актуальныя дасягненні навукі і тэхнікі. Сярод прадпрыемстваў вобласці ў асноўнай экспазіцыі свае праекты прадстаўляюць Віцебскі дзяржаўны медыцынскі ўніверсітэт і "Віцязь". Дадаткова напрацоўкі пакажуць яшчэ каля 10 прадпрыемстваў, сярод якіх Віцебскі завод электравымяральных прыбораў, навукова-вытворчая фірма "Дыполь", "Рэсурскантроль", "Е-ПАЎЭР", "Белкаралін", "ВІК - здароўе жывёл", кандытарская фабрыка "Віцьба" і БРСМ.

"На выставе "Беларусь інтэлектуальная" ад Віцебскай вобласці будзе прапанавана больш за 40 праектаў. Інтэрактыўная экспазіцыя будзе цікава прадстаўнікам усіх узростаў, кожны зможа не толькі ўбачыць, але і вывучыць прадстаўленыя тэхналогіі", - адзначылі арганізатары, дадаўшы, што праца па арганізацыі экспазіцыі актыўна працягваецца. Выставу "Беларусь інтэлектуальная" арганізавалі па даручэнню Кіраўніка дзяржавы. Напярэдадні Дня беларускай навукі экспазіцыя была прадстаўлена ў Мінску. На нарадзе 24 студзеня Прэзідэнт падкрэсліў, што з распрацоўкамі і дасягненнямі павінны азнаёміцца і ў рэгіёнах краіны. З 16 па 19 лютага выстава прайшла ў Гомелі, з 24 па 26 лютага гэту эстафету прыме Магілёў, а пасля яго - Віцебск.

БЕЛТА.