Дзіцячы музычны конкурс, тэатральныя сустрэчы і першы сольны канцэрт пройдуць сёння на XXXIII Міжнародным фестывалі мастацтваў "Славянскі базар у Віцебску". Падрабязнасці карэспандэнту БЕЛТА паведамілі ў дырэкцыі форуму.

Стартуюць фестывальныя падзеі другога дня ў 11.00 у прэс-цэнтры фестывалю. Тут абмяркуюць вынікі VI Міжнароднага танцавальнага праекта Dream Dance Fest, пераможца якога стаў вядомы напярэдадні. У гэтым годзе Гран-пры конкурсу заваяваў узорны ансамбль танца "Карусель" з Мінска. Узнагароджванне ўладальніка галоўнага прыза адбылося ўвечары 9 ліпеня на сцэне Летняга амфітэатра.

Гасцей і жыхароў горада апоўдні запросяць на прэзентацыю выставы "Уладзімір Мулявін. Спадчына вялікага маэстра". Экспазіцыя Нацыянальнага гістарычнага музея Беларусі размесціцца ў Віцебскім абласным краязнаўчым музеі.

Праграму "Зорнай гадзіны" ў 13.00 прадоўжыць народны артыст Расіі Алег Газманаў. За ім жа - права адкрыць серыю сольнікаў на "Славянскім базары". У 20.00 у фестывальным горадзе ён прапануе свой юбілейны канцэрт "55 гадоў на сцэне". Кампазітар, паэт, артыст і прадзюсар выканае прэм'еры і песні са свайго рэпертуару розных гадоў. Трэкі прагучаць увечары ў канцэртнай зале "Віцебск".

Сур'ёзная вакальная, выканальніцкая барацьба разгорнецца ў 14.00 на XXII Міжнародным дзіцячым музычным конкурсе "Віцебск". Сёння, у першы дзень спаборніцтва, удзельнікі выступяць у суправаджэнні Нацыянальнага акадэмічнага канцэртнага аркестра Беларусі імя Міхаіла Фінберга ў канцэртнай зале "Віцебск". Напярэдадні на жараб'ёўцы ў Летнім амфітэатры яны даведаліся пра запаветныя нумары, пад якімі будуць выступаць. Юная беларуска Злата Ярашэвіч выцягнула восьмы нумар для першага шоу, у другі конкурсны дзень яна выйдзе на сцэну сёмай.

У 14.00 у мастацкім музеі адбудзецца прэзентацыя выставы акварэлей "Жывыя гісторыі" Веры Станішэўскай з Эстоніі. У 15.00 у міжнародным прэс-цэнтры стартуе "Зорная гадзіна" з Burito, а ў 18.00 тут жа адбудзецца прэзентацыя альбома Вікторыі Алешка "Сапраўднае золата".

На "Славянскі базар" вяртаецца рок. У Летнім амфітэатры ў 18.30 гледачы пачуюць праект "Гаршанёў", групы Skynet, Cosa Nostra, Motor-Roller, трыб'ют Scorpions, Аляксандра Елаўскіх і іншых. Артысты канцэрта "Рок-панарама" выступяць у суправаджэнні сімфанічнага аркестра Белтэлерадыёкампаніі.

Стартуюць на фестывалі тэатральныя сустрэчы. Гэты праект у 19.00 адкрые прэм'ера спектакля "Гамлет" - трагічнай балады пра маладога прынца дацкага паводле аднайменнай п'есы Уільяма Шэкспіра. У 2024-м адзначаецца 460 гадоў з дня нараджэння сусветна вядомага драматурга. Пастаноўку прадставяць у Нацыянальным акадэмічным драматычным тэатры імя Я. Коласа.

Іскрамётнае шоу "Рытмы лета" завершыць праграму другога фестывальнага дня на пляцоўцы побач з канцэртнай залай "Віцебск". Сярод заяўленых артыстаў - Burito, Filatov & Karas, Арцём Качэр і не толькі.

XXXIII Міжнародны фестываль мастацтваў "Славянскі базар у Віцебску" праходзіць з 9 да 15 ліпеня. Афіцыйнае адкрыццё форуму адбудзецца 11 ліпеня, цырымонія закрыцця - 14 ліпеня.

БелТА