Беларусь бязвыплатна паставіць у Венесуэлу 500 т сухога натуральнага малака
12.09.2018
11 верасня, Мінск /Кар. БЕЛТА/. Беларусь паставіць у Венесуэлу 500 т сухога натуральнага малака на бязвыплатнай аснове. Адпаведнае распараджэнне 11 верасня падпісаў Прэзідэнт Беларусі Аляксандр Лукашэнка, паведамілі БЕЛТА ў прэс-службе беларускага лідара.
Прадукт будзе выраблены Лепельскім малочнакансервавым камбінатам і ААТ "Беллакт" па венесуэльскіх стандартах і змяшчаць вітаміны A і D.
Гэта рашэнне накіравана на аказанне ў складанай эканамічнай сітуацыі падтрымкі стратэгічнаму партнёру Беларусі ў Лацінскай Амерыцы, далейшую актывізацыю палітычнага і дзелавога супрацоўніцтва, умацаванне даверу і дружалюбных адносін паміж дзвюма краінамі і народамі.